ದಶದಿಶೆಯೊಳು ಆವರಿಸಿದೆ

ದಶದಿಶೆಯೊಳು ಆವರಿಸಿದೆ ನಿಶೆಯಿದು
ಉಷೆಯುದಿಸುತಲೇ ನಶಿಸುತಿದೆ
ದೇಶದ ದೆಸೆಯನು ಬದಲಾಯಿಸುವ
ಕೇಶವನಾಸೆಯು ಫಲಿಸುತಿದೆ || ಪ ||

ಯೋಗದ ಯಾಗದ ಪ್ರಯೋಗಗಳಲಿ
ಜಗದ ಜನತೆಗೂ ಸಹ ಯೋಗ
ಯುಗಸಂಕ್ರಮಣದ ಶುಭ ಸಂಧಿಯಲಿ
ಸಂಘದ ಗಂಗೆಯ ವಿನಿಯೋಗ || 1 ||

ಪರಮಾರ್ಥದ ಪರಮಾಣುವ ಶೋಧನೆ
ಭಾರತವಿಂದು ಅಗ್ರಣಿಯು
ತತ್ವದ ಸತ್ವದ ಸತ್ಯಾನ್ವೇಷಣೆ
ಬೆಳಗಿದ ಭಾರತ ದಿನಮಣಿಯು || 2 ||

ಅಭ್ಯುದಯದ ಜತೆ ನಿಃಶ್ರೇಯಸ್ಸಿನ
ಸಾಧನೆ ಭಾರತದಾಶಯವು
ಜಗದ ಜನರ ಜತೆಗೆ ಮೃಗ ಖಗ ಸಂಕುಲ
ಸಕಲರ ಕ್ಷೇಮ ಸದಾಶಯವು || 3 ||